Checklist ຫ້ອງ Server ສຳລັບອາກາດຮ້ອນຊຸ່ມ: ໄຟຟ້າ, ຄວາມເຢັນ, ຄວາມປອດໄພ ແລະ ການຈັດສາຍ

ຫ້ອງ server ທີ່ເຮົາພົບເລື້ອຍ

Server, NVR ແລະ switch ວາງຢູ່ໃນຫ້ອງເກັບເຄື່ອງ ຫຼື ໃຕ້ຂັ້ນໄດ. ແອຣ໌ບ້ານໜ່ວຍດຽວ ທີ່ມີຄົນມາປິດຕອນແລງເພື່ອປະຢັດໄຟ. ບໍ່ມີໃຜຮູ້ວ່າອຸນຫະພູມໃນຫ້ອງເທົ່າໃດ ຈົນມື້ທີ່ server ດັບເອງ. ຫ້ອງ server ທີ່ດີບໍ່ຈຳເປັນຕ້ອງໃຫຍ່ ຫຼື ແພງ, ແຕ່ຕ້ອງຜ່ານລາຍການຂ້າງລຸ່ມນີ້.

1. ສະຖານທີ່

• ບໍ່ຢູ່ຊັ້ນລຸ່ມສຸດ ຖ້າເຂດນັ້ນເຄີຍນ້ຳຖ້ວມ ຫຼື ນ້ຳຂັງໃນລະດູຝົນ
• ບໍ່ມີທໍ່ນ້ຳ ຫຼື ທໍ່ນ້ຳແອຣ໌ ຜ່ານເທິງ rack
• ບໍ່ມີປ່ອງຢ້ຽມທີ່ແດດຕອນບ່າຍສ່ອງໂດຍກົງ
• ພື້ນຮັບນ້ຳໜັກໄດ້ (rack ເຕັມອາດໜັກຫຼາຍຮ້ອຍກິໂລ)
• ມີທີ່ວ່າງໜ້າ ແລະ ຫຼັງ rack ຢ່າງໜ້ອຍ 1 ແມັດ

2. ໄຟຟ້າ

ນີ້ແມ່ນສ່ວນທີ່ສຳຄັນທີ່ສຸດໃນລາວ. ໄຟຕົກຊ່ວງ 17:00–19:00 ທີ່ load ສູງ ແລະ ໄຟດັບຕອນພາຍຸ ແມ່ນເລື່ອງປົກກະຕິ.

• ວົງຈອນໄຟແຍກສະເພາະ ຈາກຕູ້ໄຟຫຼັກ
• UPS ແບບ online double-conversion ສຳລັບອຸປະກອນສຳຄັນ
• ເວລາສຳຮອງພໍໃຫ້ປິດລະບົບຢ່າງປອດໄພ ຫຼື ລໍເຄື່ອງປັ່ນໄຟຕິດ
• ເຄື່ອງປັ່ນໄຟພ້ອມ ATS ຖ້າທຸລະກິດຢຸດບໍ່ໄດ້
• PDU ໃນ rack; server ທີ່ມີສອງ power supply ຕໍ່ເຂົ້າສອງ PDU ແຍກກັນ
• ສາຍດິນທີ່ວັດຄ່າແລ້ວ ແລະ surge protection ທີ່ຕູ້ໄຟ
• UPS ສັ່ງປິດ server ອັດຕະໂນມັດ ເມື່ອແບັດໃກ້ໝົດ (ທົດສອບແລ້ວ, ບໍ່ແມ່ນພຽງຕິດຕັ້ງໄວ້)

ຄິດຂະໜາດ ແລະ ເວລາສຳຮອງໄດ້ທີ່ ເຄື່ອງມືຄິດໄລ່ UPS.

3. ຄວາມເຢັນ ແລະ ຄວາມຊຸ່ມ

ແນວທາງດ້ານອຸນຫະພູມສະບັບປັດຈຸບັນຂອງ ASHRAE ແນະນຳອາກາດທີ່ເຂົ້າໜ້າ server ໃຫ້ຢູ່ລະຫວ່າງ 18–27°C. ເພດານຄວາມຊຸ່ມແມ່ນ dew point 15°C ຫຼື ຄວາມຊຸ່ມສຳພັດ 70%, ແລ້ວແຕ່ຄ່າໃດຕ່ຳກວ່າ, ແຕ່ໃຊ້ໄດ້ສະເພາະບ່ອນທີ່ອາກາດສະອາດ. ຖ້າມີແກັສທີ່ກັດກ່ອນ ເຊິ່ງລວມທັງໜ້າງານບໍ່ແຮ່, ໂຮງຫຼອມ ແລະ ໂຮງງານບາງປະເພດ, ASHRAE ແນະນຳໃຫ້ຮັກສາຄວາມຊຸ່ມຕ່ຳກວ່າ 50%. ລາວໃນລະດູຝົນ ຄວາມຊຸ່ມນອກອາຄານສູງກວ່າຕົວເລກເຫຼົ່ານີ້ທັງໝົດ, ສະນັ້ນ ຫ້ອງຕ້ອງປິດໃຫ້ແໜ້ນ ແລະ ແອຣ໌ຕ້ອງດຶງຄວາມຊຸ່ມອອກໄດ້. ອາກາດຊຸ່ມ ບວກກັບກຳມະຖັນ ຫຼື ຄລໍຣີນໃນອາກາດ ຈະກັດກ່ອນທອງແດງເທິງແຜງວົງຈອນ.

• ແອຣ໌ຢ່າງໜ້ອຍສອງໜ່ວຍ (N+1) ສະຫຼັບກັນເຮັດວຽກ. ແອຣ໌ໜ່ວຍດຽວເສຍ, ຫ້ອງນ້ອຍຮ້ອນເກີນ 35°C ພາຍໃນບໍ່ເທົ່າໃດນາທີ
• ຈັດ rack ແບບ hot aisle / cold aisle: ໜ້າ rack ຫັນຫາລົມເຢັນ
• ໃສ່ blanking panel ໃນຊ່ອງ U ທີ່ວ່າງ
• ເຊັນເຊີອຸນຫະພູມ ແລະ ຄວາມຊຸ່ມ ທີ່ສົ່ງແຈ້ງເຕືອນເຂົ້າມືຖື
• ເຊັນເຊີນ້ຳຮົ່ວ ໃຕ້ແອຣ໌

ຄິດຄວາມເຢັນແບບໄວ: ໄຟຟ້າທີ່ອຸປະກອນໃຊ້ ເກືອບທັງໝົດກາຍເປັນຄວາມຮ້ອນ. 1 kW ≈ 3,412 BTU/h. ອຸປະກອນໃຊ້ 3 kW → ຕ້ອງການຄວາມເຢັນປະມານ 10,236 BTU/h, ບວກຄວາມຮ້ອນຈາກຝາ, ຄົນ ແລະ ໄຟສ່ອງສະຫວ່າງ. ໃນອາກາດລາວ ພວກເຮົາເພີ່ມອີກຢ່າງໜ້ອຍ 30% → ແອຣ໌ປະມານ 13,000–18,000 BTU/h ຕໍ່ໜ່ວຍ, ຕິດສອງໜ່ວຍແບບ N+1.

ຕົວຢ່າງ: ຫ້ອງສອງ rack

2,420 W × 3.412 = ປະມານ 8,260 BTU/h. ຄວາມຮ້ອນທີ່ຜ່ານຝາດ້ານຕາເວັນຕົກ ແລະ ຫຼັງຄາ ໃນຕອນບ່າຍເດືອນເມສາ ເພີ່ມໄດ້ອີກຫຼາຍພັນຢ່າງງ່າຍດາຍ, ພວກເຮົາຈຶ່ງຈະຕິດ ແອຣ໌ 12,000 BTU/h ສອງໜ່ວຍ ທີ່ແຕ່ລະໜ່ວຍຮັບທັງຫ້ອງໄດ້ຜູ້ດຽວ. ຖ້າມີແຜນເພີ່ມ Host ໜ່ວຍທີສາມໃນປີໜ້າ, ໃຫ້ຄິດເຜື່ອແຕ່ຕອນນີ້; ປ່ຽນແອຣ໌ພາຍຫຼັງແພງກວ່າຊື້ຂະໜາດທີ່ຖືກແຕ່ທຳອິດ.

ແອຣ໌ບ້ານ ຫຼື ແອຣ໌ Precision?

ແອຣ໌ແຍກສ່ວນແບບບ້ານ ອອກແບບມາໃຫ້ຄົນສະບາຍມື້ລະ 8–10 ຊົ່ວໂມງ. ຄວາມສາມາດສ່ວນໃຫຍ່ຖືກໃຊ້ໄປກັບການດຶງຄວາມຊຸ່ມ ແລະ ບໍ່ໄດ້ອອກແບບໃຫ້ແລ່ນຕະຫຼອດ 24 ຊົ່ວໂມງ. ແອຣ໌ Precision (Close Control) ໃຊ້ຄວາມສາມາດເກືອບທັງໝົດກັບການເຮັດຄວາມເຢັນ, ຮັກສາຄວາມຊຸ່ມໃຫ້ຢູ່ໃນຊ່ວງທີ່ຕັ້ງໄວ້ ແລະ ອອກແບບມາໃຫ້ແລ່ນ 24/7. ສຳລັບໜຶ່ງ ຫຼື ສອງ rack, ແອຣ໌ Inverter ແບບແຍກສ່ວນທີ່ດີສອງໜ່ວຍແບບ N+1 ແມ່ນທາງກາງທີ່ຮັບໄດ້. ກວດເລື່ອງດຽວກ່ອນຊື້: ແອຣ໌ຕ້ອງ ເປີດເອງເມື່ອໄຟກັບມາ. ແອຣ໌ບ້ານຫຼາຍລຸ້ນຈະດັບຄ້າງຫຼັງໄຟດັບ ຈົນກວ່າຈະມີຄົນກົດຣີໂໝດ, ແລະ ນັ້ນແມ່ນທີ່ມາຂອງຫ້ອງຮ້ອນຈັດຕອນຕີສອງ.

ຕ້ອງການຫ້ອງຂະໜາດໃດແທ້?

4. ຄວາມປອດໄພທາງກາຍະພາບ

• ປະຕູລັອກ ພ້ອມລະບົບຄວບຄຸມການເຂົ້າອອກທີ່ບັນທຶກປະຫວັດ
• ກ້ອງ CCTV ເບິ່ງປະຕູ ແລະ ທາງເດີນ rack
• Rack ທີ່ລັອກໄດ້
• ສະໝຸດບັນທຶກຜູ້ຮັບເໝົາ ແລະ ຊ່າງທີ່ເຂົ້າມາ

5. ການປ້ອງກັນອັກຄີໄພ

• ເຄື່ອງກວດຈັບຄວັນ ເຊື່ອມກັບລະບົບແຈ້ງເຫດໄຟໄໝ້
• ຖັງດັບເພີງ CO2 ໃກ້ປະຕູ. ບໍ່ໃຊ້ຜົງເຄມີແຫ້ງ ເພາະຝຸ່ນຜົງເຂົ້າອຸປະກອນ ແລະ ທຳລາຍມັນ
• ຫ້ອງໃຫຍ່ ຫຼື ສຳຄັນ: ລະບົບດັບເພີງດ້ວຍແກັສ (clean agent) ອອກແບບໂດຍວິສະວະກອນດ້ານອັກຄີໄພ
• ບໍ່ມີກ່ອງເຈ້ຍ ຫຼື ວັດສະດຸຕິດໄຟໃນຫ້ອງ

6. ການຈັດສາຍ ແລະ ເອກະສານ

• ສາຍໄຟ ແລະ ສາຍຂໍ້ມູນ ແຍກທາງກັນ
• ຕິດປ້າຍທຸກສາຍທັງສອງປາຍ ແລະ ທຸກ patch panel
• ແຜນຜັງ rack (rack elevation) ແລະ ແຜນຜັງເຄືອຂ່າຍ ທີ່ອັບເດດ
• ລາຍການອຸປະກອນ, serial number ແລະ ວັນໝົດປະກັນ
• ລະຫັດຜ່ານຢູ່ໃນ password manager, ບໍ່ແມ່ນເຈ້ຍຕິດຂ້າງ rack

7. ການຕິດຕາມ ແລະ ບຳລຸງຮັກສາ

• ລະບົບ monitoring ເບິ່ງ UPS, ອຸນຫະພູມ ແລະ ສະຖານະ server
• ທົດສອບ UPS ແລະ ເຄື່ອງປັ່ນໄຟທຸກໄຕມາດ
• ລ້າງແຜ່ນກອງແອຣ໌ທຸກເດືອນ, ເລື້ອຍກວ່ານັ້ນຢູ່ໜ້າງານບໍ່ແຮ່ ຫຼື ໃກ້ທາງຝຸ່ນ
• ປ່ຽນແບັດ UPS ຕາມອາຍຸ (ທົ່ວໄປ 3–5 ປີ, ສັ້ນລົງໃນຫ້ອງຮ້ອນ). ສັ່ງລ່ວງໜ້າ ເພາະແບັດນຳເຂົ້າຈາກໄທຕ້ອງລໍ

ສີ່ຢ່າງທີ່ເຮັດໃຫ້ server ດັບ

1. ແອຣ໌ບ້ານໜ່ວຍດຽວ ທີ່ຕັ້ງ timer ປິດເອງ ຫຼື ມີຄົນມາປິດ.
2. UPS ມີຢູ່ ແຕ່ແບັດເສື່ອມແລ້ວ ແລະ ບໍ່ເຄີຍທົດສອບ.
3. ຫ້ອງ server ກາຍເປັນບ່ອນເກັບເຄື່ອງ ແລະ ກ່ອງເຈ້ຍ.
4. ບໍ່ມີແຈ້ງເຕືອນອຸນຫະພູມ. ຮູ້ຕອນ server ດັບແລ້ວ.

ມື້ສົ່ງມອບ: ທົດສອບແທ້ ບໍ່ແມ່ນພຽງເບິ່ງ

ຫ້ອງໃໝ່ ຫຼື ຫ້ອງທີ່ປັບປຸງ ຄວນຜ່ານການທົດສອບຕໍ່ໄປນີ້ ກ່ອນທີ່ໃຜຈະເຊັນຮັບ. ເຮັດນອກເວລາວຽກ.

1. ຕັດເບຣກເກີຂາເຂົ້າ UPS. ກວດວ່າທຸກ rack ຍັງເຮັດວຽກ, ແຈ້ງເຕືອນເຂົ້າມືຖື ແລະ ຖ້າມີເຄື່ອງປັ່ນໄຟ, ATS ຕ້ອງສະຫຼັບ ແລະ UPS ກັບມາໃຊ້ໄຟລັດໄດ້.
2. ປ່ອຍແບັດລົງຮອດຈຸດສັ່ງປິດລະບົບ ກັບ VM ທົດສອບ ຫຼື ໃຊ້ Agent ສັ່ງປິດໃນໂໝດທົດສອບ, ແລ້ວຢືນຢັນວ່າ Host ແລະ Storage ປິດຕາມລຳດັບທີ່ຖືກ.
3. ປິດແອຣ໌ໜຶ່ງໜ່ວຍ 30 ນາທີ ແລ້ວຈົດອຸນຫະພູມ. ແອຣ໌ອີກໜ່ວຍຕ້ອງຮັກສາຫ້ອງໄວ້ບໍ່ເກີນ 27°C ໄດ້ຜູ້ດຽວ.
4. ເປີດໄຟຄືນຫຼັງໄຟດັບ ແລ້ວເບິ່ງວ່າແອຣ໌ທັງສອງໜ່ວຍເປີດຂຶ້ນເອງ.
5. ກົດທົດສອບເຄື່ອງກວດຈັບຄວັນ ແລະ ຢືນຢັນວ່າຕູ້ແຈ້ງເຫດໄຟໄໝ້ ແລະ ລະບົບແກັສ (ຖ້າມີ) ໄດ້ຮັບສັນຍານ.
6. ເຮັດໃຫ້ເຊັນເຊີນ້ຳຮົ່ວປຽກ ແລະ ຢືນຢັນວ່າແຈ້ງເຕືອນມາຮອດ.

ຈົດຜົນໄວ້. ປີໜ້າ ເຮັດການທົດສອບເດີມ ແລ້ວທຽບກັນ.

ສິ່ງທີ່ແຕກຕ່າງໃນສະພາບຂອງລາວ

• ຄວາມຊຸ່ມລະດູຝົນ. ປິດປະຕູ ແລະ ປິດຫ້ອງໃຫ້ແໜ້ນ; ຫ້ອງທີ່ເປີດໝົດມື້ ເພາະໃຊ້ເປັນບ່ອນເກັບເຄື່ອງ ຈະບໍ່ມີວັນແຫ້ງ.
• ຝຸ່ນ ແລະ ຄວັນລະດູແລ້ງ. ລະດູເຜົາໄຮ່ໃນພາກເໜືອ ແລະ ທາງຝຸ່ນເຂົ້າໜ້າງານ ເຮັດໃຫ້ແຜ່ນກອງແອຣ໌ ແລະ ພັດລົມ server ຕັນໄວ. ກວດແຜ່ນກອງທຸກສອງອາທິດ ໃນຊ່ວງເດືອນກຸມພາ ຫາ ເມສາ.
• ຟ້າຜ່າ. ສາຍທອງແດງຍາວໆ ໄປຫາກ້ອງນອກອາຄານ ແລະ ອາຄານອື່ນ ພາໄຟກະຊາກກັບເຂົ້າ rack. ໃຊ້ສາຍໄຟເບີລະຫວ່າງອາຄານ ແລະ ຕິດ surge protection ໃນທຸກສາຍທອງແດງທີ່ອອກນອກອາຄານ.
• ອາໄຫຼ່. ແບັດ UPS, ອາໄຫຼ່ແອຣ໌ ແລະ power supply ຂອງ server ມັກມາຈາກໄທ. ເກັບພັດລົມສຳຮອງ, power supply ສຳຮອງໜຶ່ງອັນຕໍ່ລຸ້ນ server ແລະ ສາຍ patch ຊຸດໜຶ່ງໄວ້ໜ້າງານ.
• ກົດລະບຽບຂອງເຈົ້າຂອງອາຄານ. ໃນອາຄານເຊົ່າ, ຕົກລົງເລື່ອງບ່ອນວາງຄອຍຮ້ອນຂອງແອຣ໌, ການເຈາະຝາ ແລະ ວົງຈອນໄຟສະເພາະ ໃຫ້ຮຽບຮ້ອຍກ່ອນເຊັນສັນຍາເຊົ່າ, ບໍ່ແມ່ນຫຼັງຈາກນັ້ນ.

ລຳດັບທີ່ພວກເຮົາແນະນຳ

ຖ້າງົບມີຈຳກັດ, ແກ້ ໄຟຟ້າ ແລະ ຄວາມເຢັນ ກ່ອນ. ສອງເລື່ອງນີ້ແມ່ນສາເຫດທີ່ພວກເຮົາພົບເລື້ອຍທີ່ສຸດ. ອົງກອນນ້ອຍ ອາດບໍ່ຈຳເປັນຕ້ອງສ້າງຫ້ອງ: ຕູ້ rack ປິດທີ່ມີແອຣ໌ໃນໂຕ (micro data center) ຕັ້ງໃນຫ້ອງການກໍໄດ້. ໜ້າງານບໍ່ແຮ່ ແລະ ໂຮງງານ ຕ້ອງການຫ້ອງປິດ, ແຮງດັນອາກາດບວກ ແລະ ແຜ່ນກອງຝຸ່ນ. ເອົາ checklist ນີ້ມາກວດຊ້ຳທຸກປີ.

ຖ່າຍຮູບຫ້ອງ server ຂອງທ່ານສາມສີ່ມຸມ ລວມທັງແອຣ໌ ແລະ UPS, ແລ້ວສົ່ງມາໃຫ້ພວກເຮົາ. ພວກເຮົາຈະບອກໄດ້ວ່າລາຍການໃດໃນ checklist ນີ້ ຄວນແກ້ກ່ອນ.