ໃນໜ້ານີ້
ເລີ່ມຈາກຄຳຖາມງ່າຍໆ
ຖ້າລະຫັດ VPN ຂອງພະນັກງານບັນຊີຄົນໜຶ່ງຮົ່ວໃນມື້ນີ້, ຜູ້ທີ່ໄດ້ລະຫັດນັ້ນຈະເຂົ້າເຖິງຫຍັງໄດ້ແດ່?
ໃນອົງກອນສ່ວນຫຼາຍທີ່ເຮົາເຂົ້າໄປກວດ ຄຳຕອບແມ່ນ "ເກືອບທຸກຢ່າງ": File Server, ERP, ໜ້າ Admin ຂອງ Switch ແລະ NVR ຂອງກ້ອງ. VPN ແບບດັ້ງເດີມເອົາເຄື່ອງຂອງຜູ້ໃຊ້ເຂົ້າມາໃນ Network ແລະ ການແບ່ງສິດມັກຖືກລືມ. ສ່ວນ RDP ທີ່ເປີດສູ່ອິນເຕີເນັດໂດຍກົງ ແມ່ນຮ້າຍແຮງກວ່ານັ້ນອີກ.
VPN ເຮັດວຽກແນວໃດ ແລະ ອ່ອນຢູ່ໃສ
Remote Access VPN (IPsec ຫຼື SSL VPN) ສ້າງອຸໂມງເຂົ້າລະຫັດຈາກ Laptop ໄປຫາ Firewall ຂອງອົງກອນ. ມັນມີຢູ່ໃນ Firewall ເກືອບທຸກລຸ້ນ, ໃຊ້ໄດ້ກັບເກືອບທຸກແອັບ ແລະ ທີມ IT ຄຸ້ນເຄີຍ. ຈຸດອ່ອນມີສາມຂໍ້:
- ຂອບເຂດກວ້າງເກີນ. ຖ້າບໍ່ໄດ້ຕັ້ງ Rule ຕາມກຸ່ມ ຜູ້ໃຊ້ໄດ້ທັງ Subnet.
- Gateway ເປີດສູ່ອິນເຕີເນັດ. VPN Gateway ທີ່ບໍ່ໄດ້ Patch ເປັນໜຶ່ງໃນຊ່ອງທາງທີ່ກຸ່ມ Ransomware ໃຊ້ເລື້ອຍທີ່ສຸດໃນຫຼາຍປີມານີ້.
- ບໍ່ຮູ້ສະພາບເຄື່ອງ. VPN ສ່ວນຫຼາຍກວດຕົວຕົນ ແຕ່ກວດໄດ້ໜ້ອຍວ່າເຄື່ອງທີ່ເຊື່ອມມາມີ EDR, ອັບເດດແລ້ວ ຫຼື ເປັນເຄື່ອງສ່ວນຕົວທີ່ຕິດມັນແວ.
ຂໍ້ສອງບໍ່ແມ່ນທິດສະດີ. ຕະຫຼອດປີ 2024 ແລະ 2025, Remote Access Gateway ຂອງຜູ້ຜະລິດ Firewall ລາຍໃຫຍ່ຫຼາຍເຈົ້າ ມີຊ່ອງໂຫວ່ຮ້າຍແຮງທີ່ຖືກໂຈມຕີແທ້, ບາງຊ່ອງຖືກໃຊ້ກ່ອນທີ່ຈະມີ Patch ອອກມາເສຍອີກ. ກຸ່ມ Ransomware ສະແກນຊອກຫາໜ້າ Login ເຫຼົ່ານີ້ຢູ່ອິນເຕີເນັດກ່ອນສິ່ງອື່ນ. ນັ້ນໝາຍຄວາມວ່າເຄື່ອງ VPN ຕ້ອງໄດ້ Patch ຢ່າງມີລະບຽບຄືກັບ Server, ແລະ ຕ້ອງມີຄົນອ່ານປະກາດຂອງຜູ້ຜະລິດທຸກອາທິດ, ບໍ່ແມ່ນປີລະເທື່ອ.
ໝາຍເຫດສຳລັບຜູ້ໃຊ້ FortiGate
FortiOS 7.6.3 ຍົກເລີກ SSL VPN ແບບ Tunnel Mode ໃນ FortiGate ທຸກລຸ້ນ. Remote Access ຈະໃຊ້ IPsec VPN ແທນ, ເຊິ່ງຕັ້ງໃຫ້ແລ່ນຢູ່ TCP Port 443 ໄດ້ ຈຶ່ງຍັງຜ່ານເຄືອຂ່າຍໂຮງແຮມ ແລະ ມືຖືໄດ້. ສ່ວນ Web Mode ເກົ່າຍັງຢູ່ໃນຊື່ "Agentless VPN". ການຕັ້ງຄ່າ Tunnel Mode ແລະ Policy ທີ່ກ່ຽວຂ້ອງ ຈະບໍ່ຖືກແປງໃຫ້ຕອນອັບເກຣດ. ໃຫ້ສ້າງ Remote Access ໃໝ່ເປັນ IPsec ແລະ ທົດສອບກັບຜູ້ໃຊ້ບໍ່ເທົ່າໃດຄົນກ່ອນອັບເກຣດ, ບໍ່ດັ່ງນັ້ນ ພະນັກງານທີ່ເຮັດວຽກທາງໄກຈະເຂົ້າລະບົບບໍ່ໄດ້ຕັ້ງແຕ່ເຊົ້າມື້ຕໍ່ມາ.
ZTNA ປ່ຽນຫຍັງ
ZTNA (Zero Trust Network Access) ບໍ່ເອົາເຄື່ອງເຂົ້າ Network. ຜູ້ໃຊ້ໄດ້ຮັບການເຊື່ອມຕໍ່ໄປຫາ ແອັບສະເພາະທີ່ໄດ້ຮັບອະນຸຍາດ ຜ່ານ Broker, ແລະ ທຸກ Session ຖືກຕັດສິນຕາມ:
- ຕົວຕົນຜູ້ໃຊ້ ພ້ອມ MFA
- ສະພາບເຄື່ອງ: OS ອັບເດດບໍ່, EDR ເຮັດວຽກບໍ່, Disk ເຂົ້າລະຫັດບໍ່
- ບໍລິບົດ: ປະເທດ, ເວລາ, ລະດັບຄວາມສ່ຽງ
ແອັບຢູ່ຫຼັງ ZTNA ມັກບໍ່ມີ Port ເປີດຮັບຈາກອິນເຕີເນັດ ເພາະ Connector ພາຍໃນເປັນຝ່າຍເຊື່ອມອອກໄປຫາ Broker. ຄວາມຖີ່ໃນການກວດສະພາບເຄື່ອງຊ້ຳແຕກຕ່າງຕາມຜະລິດຕະພັນ; ບາງອັນກວດທຸກ Request, ບາງອັນກວດເປັນໄລຍະ. ຖາມຜູ້ຂາຍໃຫ້ຊັດ.
| Remote Access VPN | ZTNA | |
|---|---|---|
| ເຂົ້າເຖິງ | Network ຫຼື Subnet | ແຕ່ລະແອັບ |
| ກວດສະພາບເຄື່ອງ | ຈຳກັດ, ມັກແຕ່ຕອນເຊື່ອມຕໍ່ | ທຸກ Session ແລະ ກວດຊ້ຳລະຫວ່າງໃຊ້ (ຕາມຜະລິດຕະພັນ) |
| Port ທີ່ເປີດສູ່ອິນເຕີເນັດ | ມີ (Gateway) | ສ່ວນຫຼາຍບໍ່ມີ |
| ຖ້າບັນຊີຖືກຍຶດ | ຜູ້ໂຈມຕີສະແກນ ແລະ ຍ້າຍໄປທົ່ວ Network ໄດ້ | ເຫັນແຕ່ແອັບທີ່ບັນຊີນັ້ນມີສິດ |
| ໃຊ້ກັບແອັບເກົ່າ (Thick Client, Protocol ແປກ) | ງ່າຍ | ບາງຜະລິດຕະພັນຈຳກັດ |
| ການເລີ່ມຕົ້ນ | ງ່າຍ | ຕ້ອງລາຍການແອັບ ແລະ ສິດໃຫ້ຊັດ |
ZTNA ມີສາມຮູບແບບ
| ຮູບແບບ | ເຮັດວຽກແນວໃດ | ເໝາະກັບ |
|---|---|---|
| ແບບ Cloud (ມັກຂາຍເປັນສ່ວນໜຶ່ງຂອງ SSE ຫຼື SASE) | Broker ຢູ່ Cloud ຂອງຜູ້ຂາຍ, Connector ໃນເຄືອຂ່າຍຂອງທ່ານເຊື່ອມອອກໄປຫາ | ພະນັກງານກະຈາຍຫຼາຍແຂວງຫຼາຍປະເທດ, ແອັບສ່ວນຫຼາຍເປັນ Web ຫຼື SaaS |
| ແບບໃຊ້ Firewall | NGFW ທີ່ມີຢູ່ເຮັດໜ້າທີ່ Access Proxy, ມີ Agent ຢູ່ເຄື່ອງລາຍງານສະພາບເຄື່ອງ | ອົງກອນທີ່ໃຊ້ Firewall ຍີ່ຫໍ້ດຽວທັງອົງກອນ ແລະ ຢາກໃຫ້ Traffic ຢູ່ໃນອຸປະກອນຂອງຕົນເອງ |
| Identity Proxy ສຳລັບ Web App | Reverse Proxy ຢູ່ໜ້າແອັບ Web ພາຍໃນ, ບັງຄັບ SSO ແລະ MFA ກ່ອນເຖິງແອັບ | ມີແອັບ Web ບໍ່ເທົ່າໃດອັນ ແລະ ທີມ IT ນ້ອຍ |
ບໍ່ມີແບບໃດດີກວ່າໂດຍອັດຕະໂນມັດ. Broker ເທິງ Cloud ເລີ່ມໃຊ້ໄດ້ໄວ ແຕ່ທຸກ Session ຂຶ້ນກັບບໍລິການຂອງຜູ້ຂາຍ ແລະ ສາຍອິນເຕີເນັດຂອງທ່ານ. ZTNA ແບບ Firewall ເກັບການຄວບຄຸມໄວ້ເອງ ແຕ່ທ່ານຕ້ອງຮັບພາລະ Patch, ຄວາມຈຸ ແລະ High Availability ເອງ.
ກ່ອນຈະຊື້ຫຍັງ: ແກ້ VPN ທີ່ມີຢູ່
ສຳລັບອົງກອນສ່ວນຫຼາຍ ຂັ້ນຕອນຕໍ່ໄປນີ້ຫຼຸດຄວາມສ່ຽງໄດ້ຫຼາຍທີ່ສຸດ ໂດຍໃຊ້ອຸປະກອນທີ່ມີຢູ່ແລ້ວ:
- ປິດ RDP ແລະ SSH ທີ່ເປີດສູ່ອິນເຕີເນັດ. ມື້ນີ້.
- MFA ໃນທຸກບັນຊີ VPN, ບໍ່ມີຂໍ້ຍົກເວັ້ນສຳລັບຜູ້ບໍລິຫານ
- Firmware ລຸ້ນລ່າສຸດ ແລະ ມີຄົນຕິດຕາມປະກາດຄວາມປອດໄພຂອງຜູ້ຜະລິດ
- Login ຜ່ານ Directory (AD/Entra ID ຫຼື RADIUS) ແທນບັນຊີໃນເຄື່ອງ; ປິດບັນຊີທີ່ບໍ່ໃຊ້
- Rule ຕາມກຸ່ມ: ບັນຊີເຂົ້າໄດ້ແຕ່ລະບົບບັນຊີ, ວິສະວະກອນເຂົ້າໄດ້ແຕ່ Server ໂຄງການ
- ໜ້າ Admin ຂອງ Firewall ບໍ່ເປີດສູ່ອິນເຕີເນັດ
- Geo-IP ຈຳກັດສະເພາະປະເທດທີ່ພະນັກງານເຮັດວຽກແທ້ (ເຊັ່ນ ລາວ ແລະ ໄທ)
- Session Timeout ແລະ ຕັດເມື່ອບໍ່ມີການເຄື່ອນໄຫວ
- Log ການ Login ສົ່ງອອກໄປ Log Server, ມີ Alert ເມື່ອ Login ລົ້ມເຫຼວຊ້ຳໆ
- ທົບທວນລາຍຊື່ຜູ້ໃຊ້ VPN ກັບ HR ທຸກເດືອນ
ເລື່ອງ Split Tunnel: ການສົ່ງແຕ່ Traffic ຂອງອົງກອນຜ່ານ VPN ຊ່ວຍປະຢັດ Bandwidth ຂອງສາຍທີ່ສຳນັກງານໃຫຍ່ ເຊິ່ງສຳຄັນໃນລາວ. ແຕ່ຖ້າເປີດ ເຄື່ອງຕ້ອງມີ EDR ແລະ DNS/Web Filtering ທີ່ເຮັດວຽກນອກຫ້ອງການ ເພາະ Traffic ອິນເຕີເນັດບໍ່ໄດ້ຜ່ານ Firewall ຂອງທ່ານອີກ.
ລອງຄິດໄລ່ເບິ່ງ. ຜູ້ໃຊ້ທາງໄກ 40 ຄົນໃຊ້ Full Tunnel ແລະ ປະຊຸມວິດີໂອຄົນລະປະມານ 2–3 Mbps ຈະດັນ Traffic 80–120 Mbps ຜ່ານສຳນັກງານໃຫຍ່ທັງຂາເຂົ້າ ແລະ ຂາອອກ: ເຂົ້າມາຈາກ Laptop, ອອກໄປຫາບໍລິການປະຊຸມ, ແລ້ວວົນກັບມາອີກຮອບ. ຢູ່ສາຍທຸລະກິດ 100 Mbps ນັ້ນແມ່ນເຕັມສາຍ, ແລະ ຄົນໃນຫ້ອງການຈະຮູ້ສຶກກ່ອນ. ການເຮັດ Split Tunnel ໃຫ້ Traffic ຂອງ Microsoft 365 ຫຼື Google Workspace ອອກໂດຍກົງ ພ້ອມ Endpoint Protection ທີ່ເຮັດວຽກນອກຫ້ອງການ ມັກແກ້ບັນຫານີ້ໄດ້.
ເມື່ອໃດຄວນເລີ່ມ ZTNA
ຄວາມເຫັນຂອງພວກເຮົາ: ຫ້ອງການ 10–50 ຄົນ ທີ່ມີແອັບພາຍໃນບໍ່ເທົ່າໃດ ແລະ ພະນັກງານທາງໄກໜ້ອຍ, VPN ທີ່ແກ້ຕາມລາຍການຂ້າງເທິງແລ້ວ ມັກພຽງພໍໄປອີກຫຼາຍປີ. ZTNA ໃຫ້ຄຸນຄ່າຊັດເຈນເມື່ອ:
- ມີຜູ້ຮັບເໝົາ ຫຼື ທີ່ປຶກສາພາຍນອກຈຳນວນຫຼາຍ ທີ່ຕ້ອງການເຂົ້າແຕ່ບາງລະບົບ (ພົບເລື້ອຍທີ່ບໍ່ແຮ່ ແລະ ໂຄງການກໍ່ສ້າງ)
- ມີສາຂາຫຼາຍແຂວງ ແລະ ພະນັກງານເດີນທາງ
- ຖືຂໍ້ມູນການເງິນ ຫຼື ຂໍ້ມູນລູກຄ້າທີ່ອ່ອນໄຫວ ເຊັ່ນ ທະນາຄານ
- ແອັບສ່ວນຫຼາຍເປັນ Web ຢູ່ແລ້ວ
ຕົວຢ່າງ: ບໍລິສັດດຽວ ຫຼາຍຄຳຕອບ
ສົມມຸດບໍລິສັດໜຶ່ງມີສຳນັກງານໃຫຍ່ຢູ່ນະຄອນຫຼວງວຽງຈັນ ປະມານ 80 ຄົນ, ສາຂາພາກໃຕ້ 25 ຄົນ ແລະ ໜ້າງານໂຄງການທີ່ມີພະນັກງານ 15 ຄົນ ກັບຜູ້ຮັບເໝົາອີກຈຳນວນໜຶ່ງ. ທຸກມື້ນີ້ ທຸກຄົນໃຊ້ VPN Profile ດຽວທີ່ເຂົ້າເຖິງເຄືອຂ່າຍ 10.10.0.0/16 ໄດ້ທັງໝົດ. ເມື່ອລາຍການວ່າໃຜຕ້ອງໃຊ້ຫຍັງແທ້, ແບບທີ່ອອກມາມັກເປັນແບບປະສົມ:
| ໃຜ | ຕ້ອງໃຊ້ຫຍັງແທ້ | ປັດຈຸບັນ | ທີ່ແນະນຳ |
|---|---|---|---|
| ພະນັກງານບັນຊີ 12 ຄົນ | ລະບົບບັນຊີຢູ່ Terminal Server ແລະ ERP ແບບ Web | ທັງເຄືອຂ່າຍ | IPsec VPN ພ້ອມ Rule ຕາມກຸ່ມໄປສະເພາະສອງ Server ນັ້ນ ແລະ MFA |
| ວິສະວະກອນທີ່ເດີນທາງ 30 ຄົນ | ERP ແບບ Web ແລະ File Share ຂອງໂຄງການ | ທັງເຄືອຂ່າຍ | ZTNA ແຕ່ລະແອັບ, ບັງຄັບກວດສະພາບເຄື່ອງ |
| ຜູ້ຮັບເໝົາພາຍນອກ 6 ຄົນ | ແອັບ Web ອັນດຽວ | ບັນຊີໃຊ້ຮ່ວມກັນໜຶ່ງບັນຊີ, ເຂົ້າໄດ້ທັງເຄືອຂ່າຍ | ZTNA ດ້ວຍບັນຊີຊື່ບຸກຄົນທີ່ໝົດອາຍຸພ້ອມສັນຍາ |
| IT Admin 2 ຄົນ | Switch, Firewall, Hypervisor | ທຸກຢ່າງ, ບໍ່ມີ Log | VPN ໄປຫາ Jump Host ພ້ອມ MFA ແລະ ບັນທຶກ Session |
| ຜູ້ສະໜອງເຄື່ອງຈັກ | Controller ໜ່ວຍດຽວໃນໂຮງງານ | ໂປຣແກຣມຄວບຄຸມທາງໄກເປີດຄ້າງໄວ້ | ເປີດໃຫ້ເມື່ອຂໍ, ຕາມຊ່ວງເວລາທີ່ກຳນົດ ແລະ ບັນທຶກໄວ້ |
ທັງໝົດນີ້ບໍ່ຕ້ອງເຮັດເປັນໂຄງການໃຫຍ່ເທື່ອດຽວ. ແຖວທີໜຶ່ງ ແລະ ທີສີ່ ແມ່ນການຕັ້ງຄ່າໃນ Firewall ທີ່ທ່ານມີຢູ່ແລ້ວ. ມີແຕ່ແຖວທີສອງ ແລະ ທີສາມ ທີ່ຕ້ອງໃຊ້ຜະລິດຕະພັນ ZTNA, ແລະ ເລີ່ມຈາກແອັບດຽວກໍໄດ້.
ການຍ້າຍເປັນໄລຍະ
- ເລືອກແອັບ Web ໜຶ່ງ ຫຼື ສອງອັນ (ERP, HR, Intranet) ແລະ ກຸ່ມຜູ້ໃຊ້ນຳຮ່ອງ.
- ຕິດຕັ້ງ Connector ໃກ້ແອັບ ແລະ ກຳນົດ Policy ຕາມກຸ່ມ.
- ເຊື່ອມກັບ EDR ເພື່ອກວດສະພາບເຄື່ອງ.
- ຍ້າຍຜູ້ສະໜອງພາຍນອກມາໃຊ້ ZTNA ກ່ອນພະນັກງານ, ເພາະນັ້ນແມ່ນບ່ອນທີ່ຄວາມສ່ຽງສູງສຸດ.
- ຂະຫຍາຍແອັບອື່ນ ແລະ ຫຼຸດ VPN ໃຫ້ເຫຼືອແຕ່ IT Admin ແລະ ກໍລະນີພິເສດ.
ເລື່ອງ Latency: ສຳລັບ ZTNA ແບບ Cloud, Traffic ຈາກແຂວງ ຈະໄປ Broker ກ່ອນ ແລ້ວຈຶ່ງກັບມາຫາແອັບ. ເລືອກຜູ້ໃຫ້ບໍລິການທີ່ມີ Point of Presence ໃກ້ (ເຊັ່ນ ບາງກອກ ຫຼື ສິງກະໂປ) ແລະ ທົດສອບຈາກສາຂາຕົວຈິງກ່ອນເຊັນສັນຍາ.
ຄວາມຜິດພາດທີ່ພວກເຮົາພົບເລື້ອຍ
- MFA ທີ່ກົດອະນຸມັດ Push ໄດ້ທຸກເທື່ອ. ຜູ້ໂຈມຕີຈະສົ່ງຄຳຂໍຊ້ຳໄປເລື້ອຍໆ ຈົນຜູ້ໃຊ້ທີ່ເມື່ອຍກົດອະນຸມັດ. ໃຫ້ໃຊ້ Number Matching ຫຼື Hardware Key ສຳລັບຜູ້ດູແລລະບົບ.
- ບັນຊີ Local ເກົ່າຄ້າງຢູ່ໃນ Firewall ຫຼັງຈາກຍ້າຍ Login ໄປໃຊ້ Directory ແລ້ວ. ບັນຊີເຫຼົ່ານີ້ຂ້າມ MFA ໄດ້ ແລະ ບໍ່ມີໃຜຈື່.
- ມີ ZTNA Connector ໜ່ວຍດຽວ. ຖ້າ VM ນັ້ນ Reboot, ຜູ້ໃຊ້ທາງໄກທຸກຄົນຫຼຸດໝົດ. ໃຫ້ແລ່ນຢ່າງໜ້ອຍສອງໜ່ວຍ ຢູ່ຄົນລະ Host.
- ຄິດວ່າ ZTNA ແມ່ນ Endpoint Protection. ການກວດສະພາບເຄື່ອງອ່ານຂໍ້ມູນຈາກ Agent ຢູ່ເຄື່ອງ. ຖ້າ Laptop ບໍ່ມີ EDR ກໍແທບບໍ່ມີຫຍັງໃຫ້ກວດ.
- ທົດສອບແຕ່ໃນຫ້ອງການ. ລອງຈາກ 4G ຢູ່ຕ່າງແຂວງ ແລະ ຈາກເຄືອຂ່າຍໂຮງແຮມ ກ່ອນປະກາດໃຊ້.
ສິ່ງທີ່ແຕກຕ່າງໃນສະພາບຂອງລາວ
Remote Access ໃຊ້ໄດ້ພຽງເທົ່າກັບຂອບເຄືອຂ່າຍຂອງສຳນັກງານໃຫຍ່. ຖ້າ Firewall ແລະ ONT ຂອງສາຍໄຟເບີບໍ່ໄດ້ຕໍ່ UPS, ໄຟຕົກຕອນ 17:30 ຈະຕັດຜູ້ໃຊ້ທາງໄກທຸກຄົນພ້ອມກັນ; ເບິ່ງຄູ່ມືເລືອກຂະໜາດ UPS ຂອງພວກເຮົາ. ຫ້ອງການຕ່າງແຂວງຫຼາຍແຫ່ງໃຊ້ ISP ດຽວ ຫຼື Router 4G, ສະນັ້ນ ZTNA Connector ແລະ VPN Gateway ຄວນຢູ່ບ່ອນທີ່ສາຍດີທີ່ສຸດ ເຊິ່ງປົກກະຕິແມ່ນວຽງຈັນ, ບໍ່ແມ່ນຢູ່ສາຂາ. ພະນັກງານທີ່ຂ້າມໄປໄທ ມັກເຊື່ອມຜ່ານເຄືອຂ່າຍມືຖືໄທ, ໃຫ້ວາງ Geo-IP ສຳລັບທັງສອງປະເທດໄວ້ເລີຍ ແທນທີ່ຈະບລັອກທຸກຢ່າງນອກລາວ ແລ້ວຕ້ອງໂທຂໍເປີດຂໍ້ຍົກເວັ້ນເທື່ອລະຄັ້ງ.
ຜູ້ສະໜອງທີ່ຂໍເຂົ້າລະບົບ
ຜູ້ສະໜອງ ERP, CCTV ຫຼື ເຄື່ອງຈັກໃນໂຮງງານ ມັກຂໍ "ເປີດ TeamViewer ໄວ້ໃຫ້ແດ່" ຫຼື ຂໍບັນຊີ VPN ດຽວທີ່ທີມເຂົາໃຊ້ຮ່ວມກັນ. ຢ່າຍອມ. ໃຫ້ແຕ່ລະຄົນມີບັນຊີຊື່ຂອງຕົນ, MFA, ເປີດສະເພາະເວລາທີ່ນັດໄວ້ ແລະ ບັນທຶກ Session. ເມື່ອສັນຍາໝົດ ໃຫ້ປິດບັນຊີໃນມື້ດຽວກັນ.
ສົ່ງລາຍການມາໃຫ້ພວກເຮົາ
ຂຽນລາຍການວ່າໃຜເຂົ້າລະບົບຈາກທາງໄກ (ພະນັກງານ, ສາຂາ, ຜູ້ສະໜອງ) ແລະ ເຂົາຕ້ອງໃຊ້ແອັບໃດແທ້. ພວກເຮົາຈະທຽບກັບສິ່ງທີ່ VPN ປັດຈຸບັນອະນຸຍາດ ແລະ ບອກວ່າຊ່ອງວ່າງໃດແກ້ໄດ້ດ້ວຍການຕັ້ງຄ່າ ແລະ ຊ່ອງໃດຄຸ້ມທີ່ຈະໃຊ້ ZTNA.
- #vpn
- #ztna
- #zero-trust
- #remote-work
- #mfa
