ໃນໜ້ານີ້
ໄຟດັບຢູ່ຊັ້ນ 3. ຊ່າງເປີດຕູ້ Rack ເຫັນສາຍສີຟ້າ 140 ເສັ້ນ ຍາວເທົ່າກັນ, ບໍ່ມີປ້າຍ, ຫ້ອຍລົງມາບັງພອດ Switch ທັງໝົດ. ງານທີ່ຄວນໃຊ້ 5 ນາທີ ກາຍເປັນສອງຊົ່ວໂມງ, ແລະ ລະຫວ່າງທີ່ຫາ ມີຄົນດຶງສາຍ Uplink ອອກໂດຍບໍ່ຕັ້ງໃຈ.
ຕູ້ທີ່ສາຍຫຍຸ້ງບໍ່ພຽງແຕ່ເບິ່ງບໍ່ງາມ. ມັນບັງລົມລະບາຍຄວາມຮ້ອນ, ເຮັດໃຫ້ແກ້ບັນຫາຊ້າ ແລະ ເພີ່ມຄວາມສ່ຽງທີ່ຄົນຈະເຮັດລະບົບດັບເອງ. ເວລາເຮົາປະເມີນງານຂອງຜູ້ຕິດຕັ້ງຄົນອື່ນ ສິ່ງທຳອິດທີ່ເຮົາເບິ່ງແມ່ນຫຼັງຕູ້ Rack.
ຂະໜາດຕູ້: ຊື້ໃຫຍ່ກວ່າທີ່ຄິດ
| ປະເພດ | ຂະໜາດທົ່ວໄປ | ເໝາະກັບ |
|---|---|---|
| Wall-mount | 6U–15U, ເລິກ 450–600 mm | ຊັ້ນ ຫຼື ສາຂານ້ອຍ, Switch 1–2 ໂຕ |
| Floor-standing Network | 27U–42U, ກວ້າງ 600/800 mm | ຫ້ອງເຊີບເວີ, Switch ຫຼາຍໂຕ + Patch Panel |
| Server Rack | 42U, ເລິກ 1000–1200 mm | ເຊີບເວີ, Storage, UPS ແບບ Rack-mount |
ເຜື່ອບ່ອນວ່າງ 30–50% ຈາກທີ່ໃຊ້ມື້ນີ້. ເຮົາບໍ່ເຄີຍເຫັນຕູ້ທີ່ "ໃຫຍ່ເກີນ" ຫຼັງຜ່ານໄປສາມປີ. ຖ້າມີ Patch Panel ຫຼາຍ, ເລືອກຕູ້ກວ້າງ 800 mm. ຊ່ອງດ້ານຂ້າງໄວ້ເດີນສາຍແນວຕັ້ງ ເຮັດໃຫ້ທຸກຢ່າງງ່າຍຂຶ້ນຫຼາຍ.
ກວດຄວາມເລິກຂອງເຊີບເວີ ແລະ UPS ກ່ອນສັ່ງຕູ້. ເຊີບເວີ 2U ຫຼາຍລຸ້ນຍາວເກີນ 750 mm ແລະ ໃສ່ຕູ້ Network ເລິກ 600 mm ບໍ່ໄດ້.
ຕົວຢ່າງຕົວຈິງ: ນັບ U ໃນຕູ້
1U ແມ່ນຄວາມສູງ 44.45 mm ໃນຕູ້ມາດຕະຖານ 19 ນິ້ວ. ໃຫ້ນັບອຸປະກອນທຸກຊິ້ນກ່ອນເລືອກຂະໜາດຕູ້. ຕົວຢ່າງຊັ້ນຫ້ອງການ ທີ່ມີຈຸດ LAN 80 ຈຸດ ແລະ ກ້ອງ IP 16 ໜ່ວຍ:
| ລາຍການ | U |
|---|---|
| Patch Panel Cat6 24 ພອດ × 4 | 4 |
| Cable Manager ແນວນອນ × 4 | 4 |
| Switch PoE 48 ພອດ × 2 | 2 |
| Fiber Patch Panel ສຳລັບ Uplink | 1 |
| Firewall ແລະ Router ຂອງ ISP ວາງເທິງຖາດ | 2 |
| NVR | 2 |
| UPS 3 kVA ແບບ Rack-mount + ຊຸດແບັດພາຍນອກ | 4 |
| ລວມ | 19U |
ເຜື່ອຂະຫຍາຍ 40%: 19 × 1.4 ≈ 27U. ຕູ້ 27U ຈະເຕັມທັນທີ ທີ່ມີຄົນເພີ່ມອີກຊັ້ນ ຫຼື ເພີ່ມກ້ອງອີກສິບໜ່ວຍ. ເຮົາຈຶ່ງສັ່ງ 32U, ຫຼື 42U ຖ້າຫ້ອງມີບ່ອນພໍ. ສ່ວນຕ່າງລະຫວ່າງສອງຂະໜາດນີ້ ໜ້ອຍຫຼາຍ ເມື່ອທຽບກັບການປ່ຽນຕູ້ພາຍຫຼັງ ແລ້ວຕ້ອງສຽບສາຍໃໝ່ທຸກພອດ.
PDU ແນວຕັ້ງທີ່ຍຶດກັບເສົາດ້ານຫຼັງ ບໍ່ກິນ U ເລີຍ, ແຕ່ຕ້ອງໃຊ້ຕູ້ທີ່ກວ້າງ ຫຼື ເລິກພໍ. ກວດກ່ອນສັ່ງ.
ໄຟຟ້າພາຍໃນຕູ້
ອຸປະກອນທີ່ມີ Power Supply ສອງຊຸດ (ເຊີບເວີ, Core Switch ແລະ Firewall ບາງລຸ້ນ) ຄວນສຽບເຂົ້າ PDU ສອງໂຕທີ່ຕ່າງກັນ, ດີທີ່ສຸດແມ່ນຮັບໄຟຈາກ UPS ຫຼື ວົງຈອນຄົນລະຊຸດ. ຖ້າສຽບທັງສອງຊຸດເຂົ້າປລັກພ່ວງອັນດຽວກັນ, ຊຸດທີສອງກໍ່ບໍ່ໄດ້ຊ່ວຍຫຍັງເລີຍ. ຕິດປ້າຍທຸກ PDU ວ່າຮັບໄຟຈາກເບຣກເກີໝາຍເລກໃດໃນຕູ້ໄຟ, ແລະ ຕິດປ້າຍທຸກເຕົ້າວ່າຈ່າຍໃຫ້ອຸປະກອນຫຍັງ. ເລື່ອງຂະໜາດ UPS ເບິ່ງໄດ້ທີ່ ຄູ່ມືເລືອກຂະໜາດ UPS.
ຈາກເທິງລົງລຸ່ມ
ເທິງສຸດແມ່ນ Patch Panel ສະລັບກັບ Switch: Patch Panel, Cable Manager, Switch, ແລ້ວຊ້ຳ. ແບບນີ້ສາຍ Patch ສັ້ນທີ່ສຸດ.
ກາງຕູ້ແມ່ນ Firewall, Router, NVR ແລະ ເຊີບເວີນ້ອຍ.
ລຸ່ມສຸດແມ່ນ UPS ແລະ ແບັດເຕີຣີ. ມັນໜັກທີ່ສຸດ, ວາງລຸ່ມໃຫ້ຕູ້ບໍ່ລົ້ມ, ແລະ ຖ້າແບັດຮົ່ວ ກໍ່ບໍ່ໄຫຼລົງໃສ່ອຸປະກອນອື່ນ.
ສອງຢ່າງທີ່ມັກຖືກລືມ: ໃຊ້ PDU ແບບ Rack-mount ບໍ່ແມ່ນປລັກພ່ວງຈາກຮ້ານ, ແລະ ໃສ່ Blanking Panel ປິດຊ່ອງວ່າງ ເພື່ອບໍ່ໃຫ້ລົມຮ້ອນທາງຫຼັງວົນກັບມາດ້ານໜ້າ.
ຈັດສາຍ
- ສາຍ Patch ຍາວພໍດີ (0.5 m, 1 m). ສາຍ 3 m ມ້ວນໄວ້ໃນຕູ້ ແມ່ນຈຸດເລີ່ມຕົ້ນຂອງຄວາມຫຍຸ້ງ
- ແຍກສີຕາມໜ້າທີ່ ແລະ ຂຽນລົງເອກະສານ. ຕົວຢ່າງ: ຟ້າ = ຂໍ້ມູນ, ເຫຼືອງ = CCTV, ແດງ = Uplink/Firewall, ຂຽວ = ໂທລະສັບ
- Velcro ແທນສາຍຮັດພລາສຕິກ. ສາຍຮັດທີ່ດຶງແໜ້ນ ບີບສາຍ Cat6A ຈົນຄ່າ Crosstalk ຕົກ
- ແຍກສາຍໄຟ AC ອອກຈາກສາຍຂໍ້ມູນ, ເດີນຄົນລະຂ້າງຂອງຕູ້
- ຢ່າງໍສາຍ Fiber ແຄບເກີນໄປ. ໃຊ້ Fiber Tray ຫຼື ຮາງທີ່ຮັກສາລັດສະໝີການງໍ
ລະບົບປ້າຍ
ເຮົາໃຊ້ແນວຄິດຂອງມາດຕະຖານ ANSI/TIA-606: ສາຍທຸກເສັ້ນມີລະຫັດດຽວກັນທັງສອງປາຍ ແລະ ລະຫັດບອກໄດ້ວ່າມັນຢູ່ໃສ.
ຕົວຢ່າງ: B1-F2-R01-PP02-24 = ອາຄານ 1, ຊັ້ນ 2, ຕູ້ 01, Patch Panel 02, ພອດ 24
| ສິ່ງທີ່ຕ້ອງຕິດປ້າຍ | ຕົວຢ່າງ |
|---|---|
| ເຕົ້າສຽບທີ່ໂຕະ | F2-R01-PP02-24 |
| ພອດ Patch Panel | ກົງກັບເຕົ້າສຽບ |
| ຕູ້ Rack | B1-F2-R01 |
| ສາຍ Fiber Uplink | FO-R01-R02-01 |
| ອຸປະກອນ | SW-F2-01, FW-01 |
ໃຊ້ປ້າຍຈາກເຄື່ອງພິມປ້າຍ ທີ່ທົນຄວາມຮ້ອນ ແລະ ຄວາມຊຸ່ມ. ລາຍມືດ້ວຍປາກກາເຄມີ ຈະຈາງໄປພາຍໃນລະດູຝົນດຽວ.
ລະຫັດປ້າຍໃຫ້ໃຊ້ຕົວອັກສອນລາຕິນ ແລະ ຕົວເລກ ເພື່ອໃຫ້ຊ່າງລາວ, ໄທ ຫຼື ຜູ້ຮັບເໝົາຕ່າງປະເທດອ່ານໄດ້ທຸກຄົນ. ຄຳອະທິບາຍໃນເອກະສານ ຂຽນເປັນພາສາລາວ.
ຕິດປ້າຍແຄ່ໃດຈຶ່ງພໍ?
ມາດຕະຖານສະບັບປັດຈຸບັນ ANSI/TIA-606-D (2021) ແບ່ງສະຖານທີ່ເປັນສີ່ລະດັບການບໍລິຫານ (Administration Class). Class 1 ແມ່ນຫ້ອງອຸປະກອນຫ້ອງດຽວ ທີ່ດູແລອາຄານດຽວ. Class 2 ແມ່ນອາຄານດຽວ ທີ່ມີຫ້ອງສື່ສານຫຼາຍຫ້ອງ. Class 3 ແມ່ນບໍລິເວນທີ່ມີສາຍເຊື່ອມລະຫວ່າງອາຄານ, ແລະ Class 4 ແມ່ນການເຊື່ອມຫຼາຍສະຖານທີ່ເຂົ້າກັນ. ຫ້ອງການ, ໂຮງແຮມ ແລະ ໂຮງຮຽນໃນລາວ ສ່ວນຫຼາຍຢູ່ Class 1 ຫຼື 2. ສ່ວນບໍ່ແຮ່ທີ່ມີໂຮງງານປຸງແຕ່ງ, ແຄ້ມ ແລະ ຫ້ອງການ ເຊື່ອມກັນດ້ວຍ Fiber ແມ່ນ Class 3, ແລະ ບ່ອນນີ້ແຫຼະ ທີ່ຄົນມັກບໍ່ໃສ່ລະຫັດອາຄານໃນປ້າຍ ແລ້ວມາເສຍໃຈພາຍຫຼັງ.
ກົດການຕິດປ້າຍທີ່ເຮົາໃຊ້ທຸກງານ:
- ຕິດປ້າຍໃກ້ຫົວຕໍ່ ພໍທີ່ຈະອ່ານໄດ້ໂດຍບໍ່ຕ້ອງຖອດສາຍອອກ
- ໃຊ້ປ້າຍພັນສາຍແບບມີແຜ່ນໃສເຄືອບໃນໂຕ (Self-laminating), ໂຕໜັງສືຢູ່ກ້ອງຊັ້ນໃສ ບໍ່ລຶບເລືອນ
- ຕິດປ້າຍສາຍ Patch ທັງສອງປາຍນຳ, ບໍ່ແມ່ນສະເພາະສາຍຖາວອນ
- ພິມລະຫັດດຽວກັນເທິງໜ້າກາກເຕົ້າສຽບໃນຫ້ອງ. ຫ້າມຂຽນດ້ວຍມື
ແກ້ຕູ້ເກົ່າທີ່ຫຍຸ້ງ: ແຜນໜຶ່ງວັນພັກ
- ຖ່າຍຮູບໜ້າ ແລະ ຫຼັງຕູ້, ແລະ Export Config ຂອງ Switch ກັບຕາຕະລາງ MAC Address ກ່ອນແຕະຫຍັງທັງໝົດ.
- ຕົກລົງເວລາປິດລະບົບກັບຜູ້ບໍລິຫານ. ຕູ້ 96 ພອດ ປົກກະຕິໃຊ້ຊ່າງສອງຄົນ ໜຶ່ງມື້ເຕັມ.
- ໄລ່ສາຍດ້ວຍເຄື່ອງ Tone ທຸກເສັ້ນຈົນຮອດເຕົ້າສຽບ, ແລ້ວຂຽນລະຫັດໃໝ່ໃສ່ປ້າຍຊົ່ວຄາວ.
- ພິມປ້າຍຖາວອນສຳລັບທັງສອງປາຍ.
- ຖອດສາຍ Patch ເທື່ອລະ Switch, ຫ້າມຖອດໝົດຕູ້ພ້ອມກັນ, ແລ້ວສຽບໃໝ່ດ້ວຍສາຍຍາວພໍດີ ແລະ ແຍກສີຕາມໜ້າທີ່. ຖ້າມີຫຍັງເສຍ ຈະຮູ້ທັນທີວ່າມາຈາກຊຸດໃດ.
- ກວດວ່າ Uplink, ໂທລະສັບ, ກ້ອງ ແລະ Access Point ກັບມາຄົບ, ແລ້ວໃຫ້ຜູ້ໃຊ້ແທ້ທົດສອບໃນຕອນເຊົ້າຂອງມື້ເຮັດວຽກຖັດໄປ.
- ອັບເດດ Port Map ແລະ ເກັບຮູບໃໝ່ພ້ອມວັນທີ.
ເອກະສານທີ່ຕ້ອງມີ
ຕາຕະລາງ Port Mapping: ພອດ Patch Panel ໄປຫາພອດ Switch ໄປຫາ VLAN ໄປຫາອຸປະກອນ. ຮູບຖ່າຍໜ້າຕູ້ ແລະ ຫຼັງຕູ້ມື້ສົ່ງມອບ. ຜົນທົດສອບສາຍທຸກເສັ້ນ. ແລະ ສຳຄັນທີ່ສຸດ: ອັບເດດທຸກຄັ້ງທີ່ມີການປ່ຽນແປງ. ເອກະສານທີ່ລ້າສະໄໝ ອັນຕະລາຍກວ່າບໍ່ມີເອກະສານ.
ສິ່ງທີ່ເຮົາເຫັນໃນຕູ້ຂອງຄົນອື່ນ
ຕູ້ທີ່ເຕັມຕັ້ງແຕ່ປີທຳອິດ. UPS ວາງເທິງສຸດ ຫຼື ວາງພື້ນຢູ່ນອກຕູ້ ສາຍໄຟລາກຜ່ານທາງຍ່າງ. ບໍ່ມີ Cable Manager ແນວນອນ ສາຍຫ້ອຍບັງພອດ. ປ້າຍຢູ່ປາຍດຽວ. ແລະ ຕູ້ທີ່ຖືກເອົາໄປໄວ້ໃນຫ້ອງເກັບເຄື່ອງ ທີ່ບໍ່ມີແອ ຢູ່ກັບກ່ອງເຈ້ຍ ແລະ ຖັງໄມ້ຖູ.
ການດູແລ
| ຄວາມຖີ່ | ສິ່ງທີ່ຕ້ອງເຮັດ |
|---|---|
| ທຸກອາທິດ | ກວດໄຟແຈ້ງເຕືອນຂອງອຸປະກອນ ແລະ UPS, ອຸນຫະພູມໃນຕູ້ |
| ທຸກເດືອນ | ກວດວ່າສາຍທີ່ເພີ່ມໃໝ່ມີປ້າຍ ແລະ ຢູ່ໃນເອກະສານ |
| ທຸກໄຕມາດ | ອະນາໄມຟິວເຕີ ແລະ ພັດລົມ, ທົດສອບ UPS, ສຳຮອງ Config ອຸປະກອນ |
| ທຸກປີ | ທົບທວນເອກະສານທັງໝົດ, ກວດລະບົບສາຍດິນ, ວາງແຜນຄວາມຈຸ |
ກົດຂໍ້ດຽວທີ່ຮັກສາຕູ້ໃຫ້ເປັນລະບຽບໄດ້ດົນ: ບໍ່ມີໃຜເພີ່ມ ຫຼື ຍ້າຍສາຍໂດຍບໍ່ອັບເດດປ້າຍ ແລະ ເອກະສານ. ເຮັດແບບຟອມການປ່ຽນແປງສັ້ນໆ ໜ້າດຽວ ແລະ ໃຫ້ທຸກຄົນໃຊ້, ລວມທັງຜູ້ຮັບເໝົາພາຍນອກ ແລະ ຊ່າງຂອງຜູ້ໃຫ້ບໍລິການອິນເຕີເນັດ. ບໍ່ມີກົດນີ້ ຕູ້ທີ່ຕິດຕັ້ງດີທີ່ສຸດກໍ່ຈະກັບໄປຫຍຸ້ງພາຍໃນໜຶ່ງສອງປີ.
ຕູ້ໃນສະພາບແວດລ້ອມຂອງລາວ
ຝຸ່ນ (ບໍ່ແຮ່, ສະຖານທີ່ກໍ່ສ້າງ, ໂຮງງານ, ສາງຂ້າງທາງດິນ): ໃຊ້ຕູ້ປິດທີ່ມີຟິວເຕີ ຫຼື ຕູ້ IP-rated, ແລະ ອະນາໄມຟິວເຕີຕາມກຳນົດ. ຟິວເຕີທີ່ຕັນ ຮ້າຍກວ່າບໍ່ມີຟິວເຕີ ເພາະລົມບໍ່ເຂົ້າເລີຍ.
ຄວາມຮ້ອນ: ຕູ້ທີ່ບໍ່ມີແອ ໃຫ້ຕິດພັດລົມລະບາຍເທິງຫຼັງຄາຕູ້ ແລະ ເຊັນເຊີອຸນຫະພູມທີ່ສົ່ງແຈ້ງເຕືອນ. ເດືອນເມສາ ຕູ້ໃນຫ້ອງປິດທີ່ບໍ່ມີລົມ ຂຶ້ນເກີນ 40°C ໄດ້ງ່າຍ.
ຟ້າຜ່າ: ຕໍ່ຕູ້ເຂົ້າກັບສາຍດິນ (Grounding/Bonding) ທີ່ຖືກຕ້ອງ ແລະ ກວດທຸກປີ, ໂດຍສະເພາະກ່ອນລະດູຝົນ.
ຄວາມຊຸ່ມ: ເມື່ອແອປິດຕອນກາງຄືນ ຫຼື ຕອນໄຟດັບ, ຕູ້ທີ່ເຢັນຢູ່ໃນຫ້ອງຊຸ່ມ ອາດມີນ້ຳເກາະ. ຫຼີກລ່ຽງບໍ່ໃຫ້ອຸນຫະພູມຂຶ້ນລົງຫຼາຍ, ແລະ ຢ່າວາງຕູ້ກ້ອງທໍ່ນ້ຳຖິ້ມຂອງແອ ຫຼື ທໍ່ນ້ຳ.
ມົດ ແລະ ໜູ: ປິດຊ່ອງເຂົ້າສາຍດ້ານເທິງ ແລະ ດ້ານລຸ່ມຂອງຕູ້ດ້ວຍແປງກັນຝຸ່ນ (Brush Strip) ຫຼື ຢາງຂອບ. ຮັງມົດໃນ Switch ແລະ ໜູກັດສາຍ Patch ເປັນສິ່ງທີ່ເຮົາພົບເລື້ອຍໆ ໃນຫ້ອງຊັ້ນລຸ່ມ.
ຕູ້ຂອງທ່ານເປັນແນວໃດ?
ເປີດປະຕູຫຼັງຕູ້ Rack ຖ່າຍຮູບສອງຮູບ (ໜ້າ ແລະ ຫຼັງ) ສົ່ງມາທາງ WhatsApp. ເຮົາຈະບອກວ່າຕ້ອງຈັດໃໝ່ທັງໝົດ ຫຼື ພຽງແຕ່ຕິດປ້າຍ ແລະ ເຮັດເອກະສານ, ແລະ ຕ້ອງປິດລະບົບດົນປານໃດ.
- #rack
- #labeling
- #cable management
- #tia-606
- #structured cabling
- #documentation
